विचार करा आणि श्रीमंत व्हा! – भाग १ (Think And Grow Rich)
नेपोलियन हील यांनी त्यांच्या कारकिर्दीची सुरुवात एक पत्रकार बनुन सुरु केली, जेमतेम वीस वर्षाचे असताना एका वृत्तपत्रात नौकरीवर रुजु झाले होते तेव्हाची गोष्ट! त्यांच्या संपादकांनी त्यांना, पुर्वी प्रचंड गरीबीमध्ये असलेले पण थोड्या कालावधीत प्रचंड श्रीमंत झालेल्या लोकांची यादी बनवायला सांगितली आणि त्या श्रीमंत लोकांचे, संपत्तीवान बनण्याच्या मार्गावरच्या अनुभवांचा अभ्यास करुन, त्यांच्यावर लेख लिहण्याची कामगिरी सोपवली.
ह्या निमीत्ताने त्यांची भेट तेव्हाचे जगातले एक सर्वात श्रीमंत व्यक्तीमत्व आणि पोलाद उद्योगाचे सम्राट एण्ड्रु कार्नेजी यांच्याशी होते. मुळचे स्कॉटलंडचे असलेले एण्ड्रु कार्नेजी यांचा पुर्ण अमेरिकेत दबदबा होता. पण इथपर्यंतचा त्यांचा प्रवास, इतरांसाठी, अत्यंत गुढ, जादुई आणि चमत्कारिक असा होता, कारण कुमारवयात असताना ते एक गोदी कामगार असल्यापासुन कामाची सुरुवात केली होती.
माणसं श्रीमंत कशी होतात? आणि श्रीमंत होण्यासाठी एखाद्याने आपल्यामध्ये कोणकोणते गुण जोपासावेत? ह्या विषयावर नेपोलियन हीलने त्यांची मुलाखत घेतली, तेव्हा तरुण नेपोलियनची जिज्ञासुवृत्ती, चिकाटी आणि ह्या विषयातला रस पाहुन एन्ड्रु कार्नेजी प्रसन्न होतात. मुलाखत पुर्ण झाल्यावर ते युवा, तडफदार नेपोलियनला एक ऑफर देतात, “ यश मिळवण्याचं तत्वज्ञान आणि गुपितं शोधण्यासाठी, तु तुझ्या आयुष्यातली काही वर्ष खर्चण्यासाठी तयार असशील, आणि ते सुत्रबद्ध करुन जगापुढे मांडण्यासाठी तयार असशील तर मी तुला ते सुत्र आणि त्यातील रहस्ये पुर्णपणे शोधण्यासाठी पुर्ण मदत करीन.”
एन्ड्रु कार्नेजी मिनीटवॉच हातात घेऊन नेपोलियनच्या उत्तराची वाट पाहतात, एकोणतीस सेकंद विचार करुन नेपोलियन ‘हो’ असे उत्तर देतो. “बरे झाले, तु लवकर होकार दिलास, मी तुझ्या उत्तराची फक्त एक मिनीट वाट पाहणार होतो. त्यानंतर हो असते, तरी त्याचा फायदा नव्हता.”
तर अशा थरारक पद्धतीने यशाचे तत्वज्ञान शोधण्याच्या मोहीमेवर नेपोलियन हील निघतात, पुढची तब्बल वीस वर्ष ते एक ध्यास घेतात, हजारो यशस्वी आणि अपयशी लोकांच्या जीवनाचा अभ्यास करतात. ‘द लॉ ऑफ सक्सेस’ आणि ‘थिंक एंड ग्रो रिच’ ही त्यांची पुस्तकं अमेरीकेतचं नाही तर पुर्ण जगात गाजली. १९३० च्या महामंदीनंतर संपुर्ण अमेरीका एका निराशेच्या छायेत गेली होती, पण ह्या पुस्तकांच्या कोट्यावधी प्रति खपल्या, आणि संपुर्ण अमेरीकेला नेपोलियनच्या पुस्तकांनी नैराश्येच्या मळभातुन बाहेर काढलं, आणि श्रीमंत बनण्यासाठी प्रेरणा दिली.
ह्या पुस्तकात लेखकानं श्रीमंत होणारा हा प्रवास फक्त पंधरा पावलांचा असल्याचं सांगितलं आहे. काही लेख लिहुन त्या पंधरा पावलांची मी तुम्हाला ओळख करुन देणार आहे.
पाऊल पहीले – तीव्र इच्छाशक्ती
लेखकाने हा गुण क्रमांक एक वर ठेवला आहे, आपल्याला आयुष्यात नुसत्या इच्छा खुप असतात, पण त्याला ‘बर्निंग डिझायर’ बनवलं पाहीजे. साधी इच्छा आणि तीव्र इच्छा यांच्यातला एक फरक आहे. ज्यावेळी माणुस आपल्या इच्छापुर्तीसाठी सर्वस्व पणाला लावतो, ती इच्छा पुर्ण करण्यासाठी तो समर्पित होतो, अशा इच्छेला तीव्र इच्छा असे म्हणतात.
आपल्याकडे एक म्हण आहे, गाजराची पुंगी वाजली तर वाजली नाहीतर मोडून खाल्ली, म्हणजे करुन बघुया, झाले तर ठिक, नाही झाले तरी काही प्रॉब्लेम नाही, असे अर्ध्या मनाने केलेले प्रयत्न अजिबात यशस्वी होत नाहीत. म्हणुनच बहुतांश वेळेला गाजराची पुंगी वाजतच नाही, मोडुनच खावी लागते.
जोपर्यंत यश मिळत नाही, तोपर्यंत त्याच्या पिच्छा सोडणार नाही, असा एटीट्युड असलेले लोकच ह्या जगात आपलं कर्तुत्व दिमाखाने मिरवतात. एडविन सी बार्नस ह्याला एडीसनचा भागीदार बनण्याची तीव्र इच्छा होती, त्याच्याजवळ त्या तोडीचे कसलेही ज्ञान नव्हते, पैसा नव्हता, कौशल्य नव्हते, आणि एडीसन सोबत ओळखही नव्हती, पण तीव्र इच्छाशक्ती होती, आणि त्या विचाराने तो झपाटुन गेला होता.
एके दिवशी तो एडीसनच्या ऑफीसमध्ये येऊन धडकतो. त्याचा गबाळा वेष पाहुन इतर लोक त्याची मस्करी करतात मात्र त्याची चिकाटी आणि त्याचा ठामपणा पाहुन एडीसन त्याला ऑफीसबॉय म्हणुन नाममात्र पगारीत ठेवुन घेतात.
महीने जातात, वर्षे जातात, आपल्या स्वभावाने बार्नस सर्वांचा लाडका बनतो, पडेल ते काम करत जातो, एडीसनचा विश्वासु होतो आणि एके दिवशी एडीसनच्या कंपनीत भागीदार होतो. हे सर्व त्याने आपल्या विचारांच्या सहाय्याने प्राप्त केले. तो खरोखर विचार करुन, तीव्र इच्छाशक्ती वापरुन श्रीमंत झाला.
लेखक म्हणतो, अपयश हा चकवा आहे, लोकांनी नाही म्हण्टलं म्हणुन आपण हार मानुन थांबायचं नसतं! प्रयत्न सोडुन द्यायचे नसतात. त्यासाठी ते डर्बी नावाच्या एका गृहस्थाची गोष्ट सांगतात. डर्बीनी एक सोन्याची खाण घेतलेली असते, कित्येक फुट खोदल्यवर अचानक सोन्याचे कण गायब होतात. डर्बी निराश होतात, आणि सारी साधनसामुग्री भंगारवाल्याला विकतात, तो एका निष्णात इंजिनीअरचा सल्ल घेतो, फक्त तीन फुटांवर त्याला अमाप सोने मिळते.
आपल्या आयुष्यात आपणही कदाचित आपल्या स्वप्नांपासुन अवघे तीनच फुट दुर असु, तेव्हा तात्कालिक अपयशांनी माघार न घेता सातत्याने कृती करायला हवी!
यश गंमतीशीर असतं, अगदी जवळच्या टप्प्यावर असताना, आपल्याला चकवण्यात त्याला आसुरी आनंद मिळतो, पण निश्चित उद्देश आणि विशिष्ट मानसिकता असली की आपण विनाकष्टाने किंवा थोड्या कष्टाने श्रीमंत होवु शकतो.
पाऊल दुसरे – श्रद्धा
श्रद्धा एक अशी मानसिक अवस्था आहे, जी सुप्त मनाला ठामपणे सांगुन निर्माण करता येते. प्रत्येक धर्मात श्रद्धेला आणि प्रार्थनेला निर्विवाद महत्व देण्यात आलं आहे.
कुठलेही विचार सुप्त मनावर सतत बिंबवले, तर ते त्याप्रमाणे क्रिया करतं, विचारांचं भौतिक जगात रुपांतर होतं. उदा. आपण जर दिवसभरामध्ये शंभर वेळा “माझं डोकं दुखत आहे”, असं म्हणत राहीलो तर अखेरीस खरोखर डोकं दुखायची सुरुवात होते!
एखादा गुन्हेगार पहीला गुन्हा करतो, तेव्हा त्याला अपराधी वाटतं, तो स्वतःचा तिरस्कार करतो, मात्र दिर्घकाळ तो गुन्हे केल्यास निर्ढावतो, आणि त्याला त्यात काहीच चुक वाटत नाही.
जे लोक स्वतःला दुर्देवी, नियतीचे बळी किंवा कमनशीबी मानतात, हे लोक स्वतःच त्यांच्या दुर्दैवाचे निर्माते असतात, कारण एक नकारात्मक विश्वास त्यांच्या मनात रुजलेला असतो. स्वयंसुचना देऊन तो बदलता येतो.
एखाद्या वरवर कठिण किंवा अशक्य ध्येयासाठी, म्हणजे आपल्या सुप्त मनाला फसवावं लागतं, चकवावं लागतं, ती गोष्ट आपल्याला आधीच प्राप्त झाली आहे अशा थाटात वावरावं लागतं!
विश्वासपुर्वक सुप्त मनास आज्ञा दिल्या की आपोआप सकारात्मक भावनांना उत्तेजन आणि प्रोत्साहन मिळते.
मनाला एखादं असत्य पुन्हा पुन्हा सांगीतलं की ते खरं वाटु लागतं.
‘मी हे सहज प्राप्त करु शकतो’ हा विचार म्हणजे स्वतःवर श्रद्धा!
‘मला जे हवं आहे ते प्राप्त करण्यास अदृश्य शक्ती मदत करेल’, हा विश्वास म्हणजे अनंतावर श्रद्धा! ह्या दोन श्रद्धा मनात जोपासल्यास अशक्य काहीही नाही.
हृदयात आणि डोक्यात निद्रिस्त असलेली प्रतिभा जागृत केल्यास आपलं रुपांतर एका महान व्यक्तीत होतं.
पाऊल तिसरे – स्वयंसुचना
स्वयंसुचना म्हणजे स्वतः स्वतःला दिलेली सुचना. आपल्या मनाद्वारे आपल्या ज्ञानेंद्रियांना दिलेलं प्रोत्साहन! मनाच्या संवेदनशील भागात, आपल्याला जे मिळवायचे आहे, त्याची पेरणी करणं!
स्वयंसुचना म्हणजे फक्त शब्द वाचणं नाही, त्यात भावनाही ओतायला हव्या. त्या शब्दांशी एकरुपही व्हायला हवं.
श्रद्धायुक्त भावनांनी ओथंबलेले विचार सुप्त मनाकडे पाठवायला हवे.
सुप्त मनावर प्रभाव पाडण्याची क्षमता मिळवण्यासाठी चिकाटी हवी.
आपल्याला किती संपत्ती हवी आहे, तिची रक्कम ठरवा, आणि दिवसातुन चार पाच वेळा, डोळे मिटुन, त्या संपत्तीवर लक्ष केंद्रित करा.
तुमच्या हाती, प्रत्यक्षात ती संपत्ती आलेली आहे, असा विचार करा. त्या संपत्तीला अनुभवा!
ह्या जगात फुकट काहीही मिळत नाही, तेव्हा ही रक्कम मिळवण्यासाठी ह्या जगाला तुम्ही तुमच्या कृतीतुन कोणती सेवा देणार आहात, हे जाहीर करा.
एक निश्चित योजना बनवुन झपाटुन कामाला लागा, ती संपत्ती तुमची वाट पाहत आहे!
तुम्हाला अपेक्षित असलेली रक्कम तुम्हाला लवकरात लवकर मिळो, अशी ब्रम्हांडाकडे हृदयपुर्वक प्रार्थना,
धन्यवाद!..
विचार करा आणि श्रीमंत व्हा! – भाग २ (Think And Grow Rich)
‘विचार करा आणि श्रीमंत व्हा!’ लेखाच्या पहील्या भागाचेआपण खुप स्वागत केलेत, त्याबद्द्ल मनःपुर्वक धन्यवाद!
फक्त विचार बदलवुन हवी तेवढी संपत्ती मिळवण्याच्या प्रवासाची नेपोलियन हिल याने तेरा पावले शोधुन काढली.
तीव्र इच्छाशक्ती, श्रद्धा आणि स्वयंसुचना ही पहिली तीन पावले आहेत. आता पुढचा प्रवास समजुन घेऊया!
पाऊल चौथे – विशेषज्ञीय ज्ञान
लेखकाचं म्हणणं आहे, सामान्य ज्ञान कितीही मोठं असलं, कितीही जास्त असलं, तरी संपत्ती मिळवण्याच्या दृष्टीने ते तुटपुंजं ठरतं. प्रत्येक क्षेत्रात विशेष ज्ञान मिळवुन जलदपणे संपत्ती प्राप्त करण्याची संधी असते!
ज्ञान असणं वेगळं आणि पैसा मिळवण्यासाठी त्याचा वापर करणं वेगळं! हेन्री फोर्ड आणि थॉमस अल्वा एडीसन या दोघांजवळही शालेय ज्ञान अजिबात नव्हतं, पण आपल्या विशेष ज्ञान, आणि त्याचं पैशाच्या रुपात परावर्तन करण्याच्या कलेनं, त्या दोघांना अमेरीकेतल्या सर्वात श्रीमंत यादीत नेऊन ठेवलं.
एक हार्ट स्पेशालिस्ट डॉक्टर, आपल्या विशेष ज्ञानाच्या बळावर, कमी श्रमात, साधारण डॉक्टरांच्या अनेक पटीने कमाई करतो. प्रत्येक क्षेत्रातल्या तज्ञाला विशेष ओळख मिळते, सन्मान मिळतो, आणि त्यासोबत पैसाही मिळतो.
ज्ञानाच्या प्रवाहामध्ये सतत भिजायला हवे, आयुष्यभरासाठी शिकत रहायला हवे.
स्टुअर्ट अस्टिनविअर नावाचा एक कन्सट्रंक्शन इंजिनीअर होता. बाजारात मंदी आली, वयाच्या चाळीशीत, विवाहित असताना त्याने पुन्हा कायद्याच्या शाळेत प्रवेश घेतला, आणि लौकरच एक प्रगत वकील म्हणुन नावारुपाला आला. यशस्वी होण्यासाठी, नेहमी ज्ञान घेण्यासाठी आसुसलेलं असावं.
विशेष ज्ञानाच्या जोडीला एक मौल्यवान कल्पना, एकदम जलद गतिने संपत्तीच्या शिखरावर घेऊन जाते. उदा. फेसबुक, एप्पल, अमेझॉन, ओला-उबेर, मॅकडोनाल्ड, कोकोकोला, पतांजली, बिगबझार अशा कुठल्याही बिझनेस तुफान लोकप्रिय बिजनेस मॉडेलचा अभ्यास केल्यास हेच दिसुन येईल की ह्या उद्योजकांनी आपल्या विशेष ज्ञानाला एका मौल्यवान कल्पनेची जोड दिली.
पाऊल पाचवे – कल्पना
कल्पना म्हणजे एक कार्यशाळा असते, जिथे माणुस आपल्या सगळ्या योजना तयार करत असतो, मनाच्या अफाट कल्पनाशक्तीला वापरुन आपल्या संवेदना, इच्छा यांना मुर्त रुप दिलं जाऊ शकतं.
आपल्या कल्पनाशक्तीच्या बळावर मानवाने मागच्या पन्नास वर्षात जे काही प्राप्त केलं आहे, सृष्टीची रचना झाल्यापासुन इतकं संशोधन कधीच झालं नव्हतं. लेखकाचं म्हणणं आहे की अजुनही अनेक शोध लागायचे बाकी आहेत, कारण आपण अजुनही आपल्या कल्पनाशक्ती वापरण्याच्या बाबतीत प्राथमिक स्तरावर आहोत.
- निष्क्रीयतेमुळे कल्पनाशक्ती अकार्यक्षम होते.
- कल्पनाशक्तीचा वापर करुन इच्छित संपत्ती मिळवण्यासाठी एक किंवा अनेक योजना बनवा.
- डॉ. गुनसाल्स हे एक शिक्षणतज्ञ होते, ते लेखकाचे शिक्षक होते,
त्यांना अनेकदा वाटायचे की एक नवं कॉलेज सुरु करावं, त्यासाठी त्यांना दहा लाख डॉलर्स हवे होते, दोन वर्ष त्यांच्या डोक्यात ही कल्पना घोळत होती, अनेक लोकांनी ही कल्पना अशक्यप्राय असल्याचं मान्य करुन अनेकांनी हे खुळ सोडुन दिलं असतं, पण डॉ. गुनसाल्स यांना एक रहस्य माहीत होतं,
एके रात्री त्यांनी दहा लाख डॉलर्ससाठी तीव्र इच्छा व्यक्त केली, त्यांनी एक निर्णय घेतला, “एक आठवड्यमध्ये मी हे पैसे मिळवणारच!”
त्यांनी दृढ विश्वास ठेवला, की ते पैसे त्यांना लवकरच मिळणार आहेत, त्यांची सारी अस्वस्थता दुर झाली आणि मन शांत शांत झाले, दुसर्‍या दिवशी त्यांनी एका चर्चमध्ये प्रवचन दिले, जर त्यांना दहा लाख डॉलर्स मिळाले तर ते कशा पद्धतीची शिक्षणसंस्था उभारतील, याचे प्रामाणिक बारीकसारीक वर्णन करुन, त्याचे सगळ्यांच्या डोळ्यासमोर चित्र उभे केले. त्यांच्याच शब्दात सांगायचं तर,
“पोटतिडकेनं कळकळीनं मी सर्व उपस्थित सर्वांना मी माझं स्वप्न विशद केलं, मी प्रत्यक्ष ईश्वराशीच संवाद साधत होतो.”
कार्यक्रम संपल्यावर एक व्यक्ती त्यांच्या दिशेने येते, “तुम्हाला हवी तशी शिक्षणसंस्था उभी करण्यासाठी मला एक दशलक्ष डॉलर्सची मदत करायला आनंद होईल. हे माझे कार्ड!”
ते अमेरीकेतले कोट्याधीश होते, फिलीप डी. आर्थर!
पाऊल सहावे – योजना
कल्पना ह्या अस्ताव्यस्त पसरलेल्या असतात. त्यांना व्यावहारिक रुपात रचणं, त्यांना साध्य करण्यासाठी करावयाच्या छोट्या छोट्या कृतींचा आराखडा बनवणं, म्हणजे योजना बनवणे!
लेखक समजावतो, पैसे मिळवण्याची आपली योजना निश्चित करण्यासाठी आपल्या जवळच्या व्यक्तींसोबत वारंवार चर्चा करा, ह्यालाच लेखक मास्टर माईंड नाव देतो.
एक योजना अयशस्वी ठरली, तर निराश होवु नका, उत्साहाने दुसरी योजना बनवा. पुन्हा प्रारंभ करा.
कुणीही प्रयत्न सोडुन आपल्या मनात हार स्वीकारेपर्यंत अयशस्वी होत नसतो.
एक पळपूटा कधीच जिंकत नाही आणि एक विजेता कधीच पळुन जात नाही.
संपत्तीला आपण अंतःकरणातुन दिलेली हाक ऐकु जाते, आपण दिलेलं निमंत्रण ती निश्चितपणे ऐकु शकते.
या जगाची, मनोभावे सेवा करुन, आनंद मिळवत, ऐच्छिक संपत्ती प्राप्त करता येते.
दृढनिश्चयाने योजना राबवण्यासाठी नेतृत्वगुण आत्मसात करणे आवश्यक ठरते.
श्रीमंत बनण्यासाठी अमाप संधी आजुबाजुला दडलेल्या आहेत. योजना कार्यान्वित करा, आणि चिकाटीने तिला पुर्ण करा.
पाऊल सातवे – निर्णय
अनिर्णय आणि टाळाटाळ हे आपले सर्वात मोठे शत्रु आहेत, आपण त्यांच्यावर विजय मिळवायलाच हवा.
श्रीमंत लोकांना त्वरित निर्णय घेण्याची आणि गरज पडल्यास हळुहळु बदलण्याची सवय असते.
गरीब लोकांना स्वतःची निर्णयक्षमता नसते, म्हणुन इतरांच्या मतानं सहज प्रभावित होतात. वर्तमानपत्रे आणि शेजारच्यांशी चर्चा करुन ते आपली मते बनवतात.
म्हणुन लेखक म्हणतो, मास्टर मांईंड ग्रुप सोडुन इतर कोणावर विश्वास ठेवु नका.
न्युनगंड बाळगणारे लोक कळत नकळत आपलाही विश्वास नष्ट करुन टाकतात, त्यांच्यापासुन दुर असलेले बरे!
म्हणुन आपलं मन आणि मेंदु वापरा, आणि स्वतःचे निर्णय स्वतः घ्या. डोळे आणि कान सताड उघडे ठेवा, आणि तोंडाचा आवश्यक तेवढाच वापर करा.
खुप बोलतात ते खुप थोडं करतात.
अमेरीकेला स्वातंत्र मिळवुन देण्याची योजना ४ जुलै १७७६ ला एका बंद हॉलमध्ये छप्पन्न सदस्यांनी बनवली होती. त्या एका मिटींग मधल्या एका निर्णयामुळे अमेरिकेला स्वातंत्र मिळाले.
आपल्याला काय हवयं, हे ज्याला ठाऊक असतं, तोच त्वरित निर्णय घेऊ शकतो. तो व्यक्ती आपल्या शब्दांनी आणि आपल्या कर्तूत्वाने आपलं उदिष्ट वेळोवेळी जगासमोर ठेवतो.
निर्णयाच्या निश्चिततेसाठी साहस लागतं.
पाऊल आठवे – चिकाटी
उदिष्ट्य साध्य करण्यासाठी चिकाटी आवश्यक असते. यशाची तेरा पावलं चालण्यासाठी सुद्धा चिकाटी हवी.
तुम्ही स्वतःचं, एक निश्चित ध्येय आखलं, विचारपुर्वक एक योजना निश्चित केली, आणि स्वतःसाठी सुचना तयार केल्या, पण जोपर्यंत हवी ती संपत्ती तुम्हाला मिळत नाही तोपर्यंत हवी ती कृती करण्यासाठी चिकाटी अत्यंत आवश्यक आहे.
स्पष्ट ध्येय, निर्दोष योजना असणारी, आपल्या आजुबाजुला हजारो लोकं अपयशी होतात कारण त्यांच्यात चिकाटीचा अभाव असतो.
संपत्ती आकर्षित करण्यासाठी मनाला तयार करा. इच्छित वस्तुंचं स्पष्ट चित्र तुमच्या मनात उमटु द्या.
तुम्हाला एक घर हवं आहे, ते किती स्केअर फुटाचं आहे, त्याची रचना कशी आहे, ते कसं दिसतं? त्याचा रंग कोणता आहे? हे डोळ्यासमोर असल्यास त्या स्वप्नाचा ध्यास घेणं सोप्पं असतं.
समजा, तुम्हाला एक कार हवी आहे, त्या कारची कंपनी कोणती आहे?, त्या कारचा मॉडेल नं, कलर, किंमत, कारचं मायलेज तुम्हाला माहीत आहे का?, तिची शोरुम कोठे आहे, बुकिंग केल्यावर, ती कार किती दिवसात मिळते? ही सगळी माहीती शोधुन ठेवा, जसं की तुम्ही ती कार खरोखर आत्ता बुक करणार आहात, विकतच घेणार आहात. अशा आनंदाच्या मनस्थितीत वावरण्याची सुरुवात करा.
तुमच्यातल्या बहुतांश जणांनी ‘द सिक्रेट’ व्हिडीओ पाहीला असेल, नसेल पाहीला तर आवर्जुन बघा, त्यात कल्पनेत कार अशी चालवायची हे खुप छान पद्धतीने सांगीतलयं.
थोडक्यात सांगायचा प्रयत्न करतो, एका निवांत ठिकाणी बसा, आपले दोन्ही हात समोर घ्या, शांतपणे त्यांचं निरीक्षण करा, आता डोळे बंद करा, कल्पना करा, की तुमची ड्रीमकार तुमच्या कडे आहे, तिची स्टीअरींग हातात घ्या, आता कार सुरु करा,
प्रवासाला निघा, गिअर बदला, हॉर्न वाजवा, प्रवासाचा आनंद घ्या, जोरजोरात ओरडा, मनसोक्त वेगाने गाडी चालवा, त्यात हरवुन जा…
मनपसंत कार हातात येत नाही, तोपर्यंत हे करत रहा!
मनपसंत कार हातात येत नाही, तोपर्यंत हे करत रहा!
आणि ह्या कृती वारंवार करण्यासाठीच चिकाटी हवी, असे लेखक सांगतोय.
विचार करा आणि श्रीमंत व्हा! – भाग ३ (Think And Grow Rich)
“जीवनाच्या खेळात, वेळ आपली प्रतिस्पर्धी म्हणुन उभी आहे, जिला अनिर्णय अजीबत स्वीकार्य नाही”, तेव्हा, उठा, श्रीमंत बनण्यासाठी आजपासुनच ताबडतोब कामाला लागा!…….
आपल्याला इच्छा आहे तेवढी संपत्ती कमावण्यासाठी, कोणकोणते गुण आवश्यक आहेत, याविषयी नेपोलियन हिल याने विचार करा आणि श्रीमंत व्हा, ह्या पुस्तकामध्ये पंधरा पावले सांगितली आहेत. मागच्या दोन भागात (मागील भागांचे दुवे लेखाच्या शेवटी दिलेले आहेत) मी आठ पावलांचं वर्णन केलं होतं, आज पुढचा मार्ग प्रस्तुत करत आहे.
पाऊल नववे – मास्टर माईंडची शक्ती वापरा!..
संपत्ती कमवण्यासाठी संघटित, सुव्यवस्थित कृती कराव्या लागतात, वेळोवेळी सुसंवाद घडवण्यासाठी आणि निश्चित उदिष्ट्य साध्य करण्यासाठी दोन किंवा अधिक लोकांची आवश्यकता असते.
संपत्ती जमा करण्यासाठी एक शक्तीचा अखंड स्त्रोत निर्माण करणं आवश्यक आहे, आखलेल्या व्यापक स्तरावरच्या आणि मोठ्या प्रमाणावर राबवायच्या योजना, मनाची बण्धने तोडुन, प्रत्यक्षात आणण्यासाठी आपला एकट्याचा मेंदु पुरेसा शक्तिशाली नसतो, तेव्हा इतर काही जणांचं सहकार्य लाभल्यास अनेक पटीने उर्जा आणि शक्ती निर्माण होते, ह्यालाच लेखकानं मास्टर माईंडची शक्ती असं नाव देतो.
दोन व्यक्ती, एक निश्चित हेतु समोर ठेवुन, प्रामाणिक संवाद साधतात, आपलं ज्ञान वापरतात आणि कृती करतात, तेव्हा एक अमुर्त, अदृश्य अशी एक तिसरी शक्ती निर्माण होते!
श्रीमंत लोक आपल्या अवतीभवती अशी विश्वासु माणसं तयार करण्यात यशस्वी होतात, ज्यांच्याशी ते आपल्या ध्येयपुर्तीसाठी बनवल्या जाणार्‍या आराखड्याविषयी चर्चा केल्याने प्रोत्साहित होतात. एन्ड्रु कार्नेजी यांनी आपल्या यशाचं श्रेय आपल्या पन्नासहुन अधिक जणांच्या मास्टर माईंड समुहाला दिलं होतं.
कमी कालावधीत, प्रचंड श्रीमंत झालेल्या, प्रत्येकाने कळत नकळत ही मास्टरमाईंडची शक्ती वापरलेली असते. तेव्हा आपल्या विश्वासाच्या व्यक्ती निवडा, त्यांना आपलसं करा, आणि चर्चेतुन त्यांच्याकडून आपल्या स्वप्नपुर्तिसाठी उर्जा आणि सहकार्य मिळवा.
एका बॅटरीच्या वेगवेगळ्या संचापेक्षा अनेक बॅटर्‍यांचा समुह जास्त सक्षम असतो, कारण समुहात जोडल्यावर प्रत्येक बॅटरी क्षमतेपेक्षा जास्त उर्जा निर्माण करते, अगदी याच तत्वाचा वापर करुन जे लोक अवतीभवती बुद्धिमान लोकांना बाळगतात, त्यांच्यात अधिकची शक्ती निर्माण होते.
हेन्री फोर्ड आणि थॉमस अल्वा एडीसन दोघांची मैत्री झाली, दोघेजण अनेकदा आपल्या व्हिजनविषयी एकमेकांशी वारंवार खुली चर्चा करायचे आणि तेव्हापासुनच दोघांच्याही उत्कर्षाची सुरुवात झाली, तेव्हा आपणही यशस्वी किंवा आपल्याबद्द्ल आपुलकी असणार्‍या माणसांशी मास्टर माईंड संपर्क स्थापन केलाच पाहिजे.
सकारात्मक विचारांचा प्रवाह जितका ताकदवान असेल तितका संपत्तीचा ओघ देखील प्रवाही असतो.
पाऊल दहावे – कामवासनेचं रुपांतर उर्जेमध्ये करा.
वासनेत एक प्रचंड शक्ती आहे, या भावनेने प्रेरित झालेले लोक प्रचंड कृत्य करण्यास उद्युक्त होतात, अत्यंत महान उपलब्धी मिळवलेल्या लोकांनी आपल्या कामवासनेचं रुपांतर उर्जेमध्ये करण्याची कला साधलेली असते.
प्रत्येक यशस्वी माणसाच्या मागे एक स्त्री असते, हे वाक्य उगीच जन्माला आलेलं नाही, जीवनात आश्चर्यजनक पद्धतीने संपत्तीवान झालेले लोक, महान लेखक, कवी, संगीतज्ञ, कलाकार, खेळाडु, नेते आणि आपपल्या क्षेत्रात शिखरावर पोहचलेले लोक, त्यांच्या जीवनाचा लेखकानं अभ्यास केल्यास, त्यांना असं आढळुन आलं की त्यातील बहुतांश लोकांना, एका स्त्रीकडुन प्रेरणा भेटत होती.
माणसाच्या किंवा प्राण्याच्या कामवासनेच्या ग्रंथी नष्ट झाल्यास, त्याच्यातल्या काहीतरी करुन दाखवण्याचा, कर्तेपणाचा स्त्रोतही नष्ट होतो. जसं वंध्यत्व आलेला बैल, गाईसारखा सरळसुत बनतो, तसंच, वंधत्व आलेले स्त्रीपुरुषही आपली लढाऊ वृत्तीच हरवुन बसतात.
कामवासनेची भावना, कुठल्याही प्रकारच्या मानसिक उत्तेजनांपेक्षा सर्वात तीव्र आणि शक्तिशाली आहे. नदीला महापुर आल्यास, ती रौद्र रुप धारण करुन गावच्या गाव उद्धवस्त करते, पण त्याच नदीला बांध घालुन, धरण बांधुन अडवल्यास, ती सर्वश्रेष्ठ सर्जनही करते, कामवासनेला अनिर्बंध न होवु देता, तिचं निर्मितीक्षम कल्पनाशक्तीत रुपांतर करण्यात यशस्वी झाल्यास सहावं ज्ञानेंद्रिय जागृत होतं.
सामान्य माणुस आणि बुद्धिमान माणुस यांच्यात ह्या सहाव्या इंद्रियाचाच फरक असतो. कामवासनेच अमर्याद शक्ती नियंत्रित होवुन तिचं रुपांतर निर्मितीक्षम विचार शक्तीत होतं, तेव्हा अंतर्मनाचं अफाट मार्गदर्शन आपलं रुपांतर अनोख्या व्यक्तिमत्वात करतं!
लेखक म्हणतो की स्त्रीला वश करणं, खुष करणं हीच पुरुषाची सर्वात मोठी उत्तेजक शक्ती असते.
अब्राहम लिंकन वयाच्या चाळीशीपर्यंत झगडत होता, त्यानंतर त्याच्या आयुष्यात ‘एन रुटलेज’ नावाची स्त्री आली, जिथुन पुढे लिंकन यशाच्या शिखरावर पोहचला, अगदी त्याउलट नेपोलियन बोनापार्टची पहीली पत्नी जोसेफाईन जोपर्यंत त्याला उत्तेजित करत होती तोपर्यंत तो प्रत्येक लढाई जिंकत सुटला, आणि जेव्हा त्या दोघांत बेबनाव झाला, तेव्हा मात्र नेपोलियनचे साम्राज्यही उद्ध्वस्त झाले.
व्यक्तिगत चुंबकत्व प्रबळ करणारे पाच घटक –
- हस्तांदोलन – अशा लोकांच्या हाताच्या स्पर्शात चुंबकत्व असतं, ते ताबडतोब जाणवतं!
- आवाजाचा स्वर – प्रबळ कामवासना असणार्‍यांचा आवाज संगीतमय आणि सुंदर असतो.
- शरीराची ठेवण आणि चालना – हे लोक अतिशय जलद चालतात, आणि त्यांच्या चालीत डौल आणि सहजता असते.
- विचारांचं कंपन – हे लोक आपल्या विचारांच्या कंपनांनी आजुबाजुच्यांना प्रभावित करु शकतात.
- शारिरीक सजावट – हे लोक आपल्या बाह्यरुपाबद्द्ल फार जागरुक असतात, आणि व्यक्तिमत्वाला शोभतील असेच कपडे घालतात.
पाऊल अकरावे – अर्धचेतन मन
माणसाचं सचेतन मन आणि असिमीत बुद्धीमत्ता यांच्यात दुवा म्हणुन अर्धचेतन मन काम करतं!
अर्धचेतन मन हे विचार साठवण्याचं कोठार आहे, तिथुन हवा तो विचार आपण आपल्या चेतन मनात आणु शकतो. आपल्या सुप्त मनावर आपण पुर्णपणे ताबा मिळवु शकत नाही, पण कुठलीही योजना, इच्छा किंवा हेतु त्याच्या स्वाधीन मात्र करु शकतो.
सुप्त मन हे आपल्या भावनांच्या, संवेदनांच्या प्रभावाखाली वावरतं, आपल्या मनात सात प्रकारच्या मोठ्या सकारात्मक भावना आणि सात प्रकारच्या मोठ्या नकारात्मक भावना दडलेल्या असतात.
स्वयंसुचना दिल्यास सकारात्मक भावनांचा प्रभाव निर्माण करुन अचेतन मनाशी संवाद साधता येतो.
प्रार्थना करणं, हे एक प्रकारे आपल्या अचेतन मनाशी संवाद साधणंच आहे, आनंदी, समाधानी मनाने केलेली प्रार्थना परिणामकारक ठरते, भीतीचा पगडा असलेल्या मनस्थितीत केलेली प्रार्थना व्यर्थ जाते.
ज्याप्रमाणे रेडीओ ध्वनीलहरी पोहचवतो, अगदी तसंच तुम्हीही आपल्या असिमीत बुद्धीमत्तेशी नियमित संवाद साधु शकता. अंतःकरणपुर्वक केलेल्या प्रार्थनेचे शब्द असिमीत बुद्धीपर्यंत पोहोचतात, आणि त्याचं प्रत्युत्तर कल्पनेच्या, निश्चित योजनेच्या रुपात मिळतं.
पाऊल बारावे – मस्तिष्क/मेंदु
आपल्या मेंदुत, अत्यंत सुव्यस्थितपणे रचलेल्या, दहा ते चौदा अब्ज पेशी आहेत, प्रत्येक माणसाचा मेंदु विचारांच्या कंपनांचं ग्रहण आणि प्रक्षेपण करण्यास सक्षम असतो.
उत्तेजित झालेला मेंदु विचारांची गती प्रचंड वाढवतो, तेव्हा दुसर्‍यांनी प्रक्षेपित केलेले विचार आणि कल्पना आकर्षित करतोच, सोबत स्वतःच्याही विचारांचं इतरांवर यशस्वी प्रक्षेपणही करतो.
पाऊल तेरावे – सहावं इंद्रियं
आधीच्या बारा तत्वांवर प्रभुत्व मिळवलं की तेरावं तत्व आपल्याला शिखरावर घेऊन जातं. माणसाला आपल्या पाच ज्ञानेंद्रियाव्यतिरीक्त अन्य कुठल्यातरी मार्गाने निश्चित ज्ञान असं मिळत असतं.
ज्यावेळी मानवी मन असाधारणपणे उत्तेजित झालेलं असतं, तेव्हा त्याला हे ज्ञान मिळत असतं. सहावं इंद्रिय उत्तेजित झालं की ह्रद्याची गती पण सामान्याहुन अधिक होते. या शक्तीचा वापर करण्याची क्षमता मंदगतीने प्राप्त होत असते. या तत्वाचा वापर करुन तुम्हीही लाभान्वित होवु शकता.
ही अज्ञात शक्ती मोठमोठ्या विचारवंतांच्या, पुढार्‍यांच्या, कलावंतांच्या, संगीतज्ञांच्या, लेखकांच्या, राजकारण्यांच्या प्रेरणेचा स्त्रोत असते.
ही होती श्रीमंत असण्यासाठी आवश्यक असणारी तेरा रहस्य, यशस्वीतेचा ‘एन्ड्रु कार्नेजी’ फॉर्मुला या पुस्तकाची प्रेरणा आहे, जो वापरुन लाखो लोक प्रचंड श्रीमंत झाले. ही सोपी मुलभुत तंत्र वापरुन तुम्हालाही संपत्तीवान होण्यासाठी शुभेच्छा!..
शेवटी मला पुस्तकातलं अप्रतिम वाक्य आठवतयं, “जीवनाच्या खेळात, वेळ आपली प्रतिस्पर्धी म्हणुन उभी आहे, जिला अनिर्णय अजीबत स्वीकार्य नाही”, तेव्हा, उठा, श्रीमंत बनण्यासाठी आजपासुनच ताबडतोब कामाला लागा!..
धन्यवाद!
https://www.manachetalks.com/3189/think-and-grow-rich-marathi/
कोणत्याही टिप्पण्‍या नाहीत:
टिप्पणी पोस्ट करा