सध्या फार कमी दलालांकडे ही सोय उपलब्ध आहे. पुढे हळूहळू या दलालांची संख्या वाढत जाईल. ज्या दलालांकडे ही सोय उपलब्ध आहे त्यांच्याकडे जाऊन तुम्हाला एक अर्ज व केवायसीचा फॉर्म भरावा लागतो. एकदा तुमचा अर्ज स्वीकारला की, तुम्हाला आयडी क्रमांक दिला जातो. त्याच्या जोडीला एक स्वतंत्र बँक खाते उघडावे लागते. याच खात्यामार्फत तुम्हाला सर्व व्यवहार करावे लागतील. भारतीय चलनात तुम्ही या खात्यात रक्कम जमा केलीत की, तिचे रूपांतर डॉलरमध्ये होते. ही रक्कम जमा झाल्यावर तुम्ही समभागांची खरेदी करू शकता. यानंतर तुम्ही जशी भारतीय शेअर बाजारात समभागांची खरेदी करता तशाच प्रकारची खरेदी विदेशातील बाजारातून
करू शकता. कोणत्या देशातील शेअर बाजार आहे आणि कोणत्या समभागांची खरेदी करावयाची आहे हे एकदा तुम्ही ठरविलेत की, समभागांची खरेदी तुम्ही करू शकता. तशाच प्रकारे विक्री करता येते. त्यानंतर तुम्ही विकलेल्या समभागांचे पैसे खात्यात जमा होतात.
विदेशातील समभागात कशासाठी खरेदी करावयाची, असा प्रश्न उपस्थित होईल. तुम्ही जर शेअर बाजारातील मोठे खिलाडी असाल आणि तुम्हाला जगातल्या घडामोडीनुसार नफा कमवायचा असेल तर तुम्हाला विदेशातील समभाग आपल्या पोर्टफोलियोत ठेवणे गरजेचे ठरते. अमेरिकेत जर मंदी असेल आणि युरोपातील जर्मनीत तेजी असेल तर विदेशातील गुंतवणुकीचा तुम्ही फायदा उठवू शकता. जर्मनीत सिमेन्सचा समभाग कमी आहे आणि तोच समभाग अमेरिकेत चढता आहे तर तो समभाग जर्मनीत घेणे शहाणपाणाचे ठरते किंवा आफ्रिकेतील संपन्न खाणीच्या कंपनीतील गुंतवणुकीचा लाभ तुम्ही इथून गुंतवणूक करून घेऊ शकता. एवढेच कशाला, चीनमधील जगातील सर्वात मोठ्या बँकेचे समभाग तुम्ही तुमच्या पोर्टफोलियोत ठेवू शकता. मात्र, या गुंतवणुकीत धोकेही आहेत. कारण त्या संबंधित देशातील अर्थव्यवस्था तेथील कंपन्यांची आर्थिक स्थिती याचा सखोल अभ्यास असणे आवश्यक ठरते. त्याचबरोबर त्या देशात असलेल्या वेळेच्या बंधनामुळे येणारे अनेक निर्बंधही आहेतच. त्या देशात असलेली कररचना आपल्याला ठाऊक असणे आवश्यक ठरते. कारण त्यानुसार तुम्हाला कर भरावा लागतो. अशा प्रकारे जर तुम्ही अभ्यास चांगला केलात तर जागतिक पातळीवरील कोणत्याही समभागांची खरेदी इथे बसून करू शकता आणि त्यात चांगला फायदा कमवू शकता.
कोणत्याही टिप्पण्‍या नाहीत:
टिप्पणी पोस्ट करा